Joxe Aranzabal fareroa luze eta zabal ibili zen zortzigarren lurraldetik Arantza Kaltzadaren eskutik. Amarauna irratsaioaren barruan, igandero goizeko 10:30ean egiten zuten “8. probintzia” izeneko atala. Euskadi Irratian Arantxak aurkeztutako saioa emititu ondoren, Joxe Aranzabalek argitaratu egiten zuen solasaldia, podcast moduan entzun edo/ta deskargatu ahal izateko.

HISTORIA LUZEKO SAIOA

2007ko irailaren bukaeran hasi ziren, bai emanaldia, eta bai blogeko sarrerak, azalpen xume honekin: “Amarauna irratsaioaren barruan 8. probintzia izeneko atala entzuten duzuen entzuleok, hauxe duzue 8. probintzia irratsaioaren bloga. Hementxe utziko ditugu programa bakoitzaren testuak eta, ahal denean, baita podcastak ere. Gustura jasoko ditugu zuen proposamenak, iradokizunak eta erantzunak. Ongi etorri, bada, eta nahi duzuen arte.”

Horrela astero astero saioa egin eta Joxek blog probintzial honetan saioen audioak eta laburpen txiki bat argitaratzen zuen.

Bederatzi hilabete beranduago, uda hasita zegoela, azken saioa emititu zen eta Aranzabalek hauxe argitaratzen zuen,  emisioaren audioarekin batera:

Horra “8. probintzia“ irratsaioaren 40. saioa. 2008ko ekainaren 29an egin dugu Euskadi Irratian, Amarauna saioan.

Edukiak
Saio honetan, honako gai hauek jorratu ditugu:

• 7.500 blog inguru euskaraz.
• Zertaz hitz egin den euskal blogosferan.
• Bi blog aipagarri: Bihotz Gazte Goxo eta Merkatari.net.